Муус устар 12 күнүгэр фермердэр мунньахтара буолан ааста

Сири кытта үлэлэһээччилэргэ докумуон үлэтин аччатарга өрөспүүбүлүкэ фермердэрэ туруорсаллар. «Арҕаа дойдулар атарахсытар кэмнэригэр тыа хаһаайыстыбатыгар таһаарыылаах үлэни олохтуурга административнай харгыстары аҕыйатар тоҕоостоох», — диэн Дьокуускайга мустубут фермердэр санааларын этиннилэр. 100-чэкэ фермер күн бастакы аҥарыгар семинарга олохтоох оҥорон таһаарыыны күүһүрдэргэ, бородууксуйаны үксэтэргэ сүбэлэстилэр. Ону тэҥэ, Саха тыйаатырыгар форумҥа кыттыыны ыллылар. «Санкцияларынан туһанан үлэлииргэ-хамсыырга, бэйэ табаарын оҥорорго, дьоммутун-сэргэбитин бородууктанан хааччыйыыга түгэн көһүннэ. Онон туохтан да санаабыт сынтарыйбакка иннин диэки дьүккүйэн баран иһиэҕиҥ!», — диэтэ СӨ бааһынай хаһаайыстыбаларын ассоциациятын салайааччыта Александр Артемьев.