Beva ayolning 11 yillik kurashi va iztiroblari

Qahramonimiz 2013-yilda turmush o‘rtog‘idan OIV yuqtirgan va ushbu kasallik bilan 11 yildan beri kurashyapti. U dunyo bo‘ylab 40 milliondan ziyod, O‘zbekistonda esa 47 mingdan ko‘p odamning qatorida bu davosiz dard bilan yashab kelmoqda. U kunlarni qo‘rqinchli tush kabi eslaydi... “Oyog‘im ostidagi dunyo yo‘qolib qoldi...” “U holatni tasvirlab berish qiyin. Odamning ishongisi kelmaydi... Chunki hamma kasallikni eshitarkansiz: Sil, Gepatit B, S yoki saraton. Bularni eshitsangiz, davolansa, yaxshi bo‘pketadi, deb qo‘yarkankansiz. Lekin o‘zingizdan o‘tgani boshqacha bo‘larkan... Oyog‘ingiz tagidagi dunyo yo‘q-da! Hayot tugadi, deb o‘ylaysiz... Shunaqa tushkunlikka tushib ketdikki... o‘rtada ishonch degan narsa bor. Kimdan bo‘ldi, nima bo‘ldi, qanaqa bo‘ savol-javob, gumonlar. Farzandlar sog‘ligi qanaqa ekan, yuqmaganmi? Xullas, uyingizda halovat yo‘qoladi...”, deydi u.