Фәнүзә Аллағолова, Өфө районы Нагаево ҡасабаһы

Юҡһыныу Үләндәрҙе йырып еләк йыям, Үткәндәргә китә уйҙарым. Күҙ алдыма баҫа тыуған яғым, Еләк йыйған Һәпәр буйҙары. Сейәлеп тә ятты ер еләге Аҡ ҡайынлы Һәпәр буйында, Төрлө сәскәләрҙәй ҡатын-ҡыҙҙар Килгән ине еләк туйына. Эреләрен сүпләп еләк йыйҙыҡ, Көлә-көлә, икәү һөйләшеп. Ҡайындарҙың сәсен ел тараны, Япраҡтары менән серләшеп. Умырылып уңды еләк быйыл, Тағы килдем Һәпәр буйына, Сәскәләргә ҡунған күбәләктәй Ҡыҙҙар сыҡҡан еләк туйына. Күҙҙәремде йомам, иркәләнәм, Сәстәремде һыйпай елкәйем. Эре, ҡыҙылдарын ғына сүпләп Еләк йыйған кеүек әсәйем. Йәйҙәр үтә, йылдар үтә, Ер еләге уңа яланда. Эс серҙәрен һиңә сискем килә, Тик юҡһың шул, әсәй, янымда.