Таатта талба талааннааҕа Ульяна Матвеева туойтан ураты оҥоһуктары таптайар

Таатта улууһун Тыараһа нэһилиэгин олохтооҕо Ульяна Матвеева идэтинэн учуутал. Ол эрэн кинини биир дойдулаахтара илиитигэр дэгиттэр талааннаах маастар, иистэнньэҥ быһыытынан ордук билэллэр, киэн тутта кэпсииллэр. Ульяна Васильевна түүлээхтэн кыһыҥҥы таҥаһы тигэр, бэл, хомус оттон тэллэх, көбүөр өрөр эбит. Маастар бэйэтэ билинэринэн, маннык талаан киниэхэ 102 сааһыгар диэри олорбут эбээтиттэн бэриллибит. Ульяна Васильевна 2016 сылтан өссө биир ураты хайысханы баһылаан, билигин даҕаны ол дьарыгынан айа-тута сылдьар. Кини туой буортан сахалыы иһиттэри, сувенирдары, кыра мал-сал арааһын оҥорор. Маастар бастыҥ үлэлэрэ быыстапкаҕа сыаналаналлар, дьон-сэргэ кэрэхсэбилин тохтоло суох ылаллар, оттон кини бэйэтэ дьоҕурбун салгыы сайыннарыахпын баҕарабын диэн үллэстэр. Айылҕа туойунан дьиҥ сахалыы ньыманан иһити таптайар дьон билигин элбэҕэ суохтар, олортон биирдэстэрин, Ульяна Васильевна Матвеева кэпсээнин сиһилии биһиги видеобытыгар истиҥ!