Хайыһарга анаммыт олох

Хайыһар спорда сайдарыгар олоҕун анаабыт, үгүс өрөспүүбүлүкэ, Арассыыйа чемпионнарын, призердарын иитэн-үөрэтэн таһаарбыт талааннаах тренер, тэрийээччи, салайааччы Анатолий Афанасьевич Артемьев сырдык аатыгар хайыһарга СӨ кубогын 5-с этаба Амма нэһилиэгин үрдүк таһымҥа ыытылынна. Күрэххэ Сахабыт сирин күүстээх хамаандалара - барыта 135 кыттааччы Амма сынньалаҥ пааркатын түһүүлээх-тахсыылаах уустук трассатын суолугар туран илин-кэлин түһүстүлэр. Күрэҕи түмүктүүр 10 км дистанцияҕа өрөспүүбүлүкэ ааттаах-суоллаах маастардара бары кытыннылар. Түмүккэ утараһааччыларын ырааҕынан хаалларан Арассыыйа спордун маастара, тренер А.А. Артемьев иитиллээччитэ Амматтан Никита Аржаков эрэллээхтик бастаата. Өрөспүүбүлүкэ хайыһарга кубогын кыайыылаахтарыгар СӨ үөрэҕириитин туйгуна, СӨ физическэй культураҕа уонна спорка туйгуна, РФ уопсай үөрэхтээһинин бочуоттаах үлэһитэ, Амма нэһилиэгин, Амма улууһун бочуоттаах олохтооҕо Анатолий Артемьев дьиэ кэргэнэ, аймахтара, үөрэппит оҕолоро туруорбут сыаналаах бириистэринэн наҕараадаланнылар. Бу күн Анатолий Афанасьевич кэргэнэ педагогическай үлэ ветерана, СӨ үтүөлээх учуутала, Амма улууһун бочуоттаах олохтооҕо, РФ үөрэҕириитин туйгуна Александра Ивановна Артемьева хомуйан оҥорбут “Амма улууһун чулуу дьоно“ сериянан тахсыбыт “Хайыһарга анаммыт олох“ диэн кинигэ сүрэхтэннэ. Кинигэҕэ А.А. Артемьев туһунан чугас дьонун, аймахтарын, үөлээннээхтэрин, коллегаларын истиҥ-иһирэх ахтыылара киирбиттэр. Вера Иванова #yakutia #амга #амма #нвксаха #сахасирэ #хайыһар #тренер#лыжныйспорт #лыжныегонки #биатлон ##артемьев#анатолийафанасьевич #кубокреспублики #ахтыы #воспоминание