Atäń Ězement́ Ěrzäń keleń čide pškademazo

Atäń Ězemeń Pškademazo 2023-ce ień Ěrzäń keleń čidenť № 12/23 30 ieť jutasť škastonť, zärdo Räbov Anatolień lemsě Ěrzäń keleń idema Fondoś kemekstyze te Ine Pokščinť. Vasencede son teškstazeĺ 1993 iestě Räbov Anatolień 100-ce čačoma čistěnzě. Vasence ěrzäń professoroś, čumovtomo ledezeĺ a śkamonzo, martonzo, teke “raśkeń jat“, teke “nacionalist“, maštozeĺť lamo ěrzät. Malaso se škaś, zärdo miń ledstäsynek ěŕva čavozenť, ěŕva naŕgazenť! Jovtasynek ěŕva čavicä - naŕgicänť idemevseń lemenzě. Ěrzäń keleń čiś uĺneś nardev nežeks ěrzäń ojmenteń, tonavtś večkeme Čačoma Mastoronok, raśkenek, ěś ojmeń vańksčinek, sval ulems ěrzäń lomaneks. Meze polavtovś tedide? Meleť-manyť jutasť lomaneń lovomat. Syń nevtiź, koda bojkasto jomi minek raśkeś: kemeńkirt töžat ěŕva ień perť. Alamolgadyť ěrzäks kortycätne, ěrämoso tiriń keleń tevs putycätne, ěś tiriń keleń vanstomas-kastomas terdicätne. Teń tarkas, lamot ěrzäks kortycätnede, lezdyť ruzoń kirdivienteń ěś tiriń raśkeń maštomasonť. Kapšavtyť ěś raśkenť ruzyjavtomanzo. Mančiť mastoroń keles ěrzä raśkenť «vadrä ěrämodonzo»! Čaviť mošnasost meštes, sornovtyť koštonť pižneź-moraź - «mon ruzan», teke synest viśks ulems ěrzäks. Te madsti raśkenek kalmos. Kanä, ězť kadovo Ěrzäń Meleń tolněń jožoso kandycät? Atäń Ězemeś a kemi teneń. Uliť ěrzät, konat a potliť pilest a marämga, a veĺtiť seĺmest a neemga ěś raśkeń kažočitneń! Uliť ěrzät, konat čaŕkodiť kozoń veti raśkenzě kirdivieś. Neť ěrzätneneń pškadi Atäń Ězemeś, apak vano, kortyť-a kortyť syń ěrzäks, sodasyź-a sodasyź tiriń kelenť! Zärdo paly sedejsěnek ěrzäń tolněś, zärdo melävty ěś raśkenť vandyčizě - a učotano. Škamok araś. Purnavtano vejs, kortano - arsetäno, koda idems, koda vanstoms, koda kastoms sede tov minek tiriń kelenť! Tejttäno seń mezes satyť kedenek, prevenek, vienek! A peĺttäno, a čaťmońtäno! Mindenek baška ězť kadovo ěrzäń keleń, ěrzäń raśkeń idicät! A idesynek atät-sěrdätnesě kandozenť - a kineń karmi teškstams Ěrzäń keleń činť sede tov! Zärs, ěŕvanteń, kiń sedejsě tipeĺdi Ineškipazoń tolněś, meĺkstatano Ěrzäń keleń čiń vadrä jutavtoma, valdo Ěrzäń meĺ, keme šumbrači, vańks ěrzäń jožo! Ěräzo Ěrzäń raśkemek! Ulezě Ěrzäń Mastoromok! Ěräzo Ěrzäń kelemek! Pingede pinges! Atäń Ězemeś. 2023 ień, čadykovoń 15-ce či.