“Учь къыз“ - къазантатар халкъ масалы

Учь къыз. Къазантатар халкъ масалы Бир заманда бар экен, бир заманда ёкъ экен, мераметли, фукъаре бир къадын яшагъан экен. Къадыннынъ бири-биринден дюльбер учь къызы олгъан. «Къызларымны бакъайым, кимселернинъ балаларындан эксик олмасынлар», деп гъарип къадын гедже-куньдюз чалышкъан. Къызлар осьтилер, етиштилер, дерсинъ, айнынъ он дёртю. Арадан чокъ кечмеден къудалар кельдилер. Къызлары, бири биринден артындан къоджагьа чыкътылар тувгъан эвлеринден кеттилер. Ана янъгъыз къалгъан. Арадан йыллар кече. Гъарип ана къартая, агъыр хасталыкъкъа огърай. Янъгъызлыкъ, хасталыкълар оны о къадар чекиштирелер ки, о сансарчыкъкъа мураджаат эте: Бар да айт оларгъа, сансарчыкъ, тез келип менден хабер алсынлар. - Вай! - деп, башыны саллай уйкен къызы, анасынынъ алыны эшитип. - Вай! Мен чапа-чапа барыр эдим, лякин манъа мынавы эки къара синини темизлемек керек!.. - Ананъ агъыр алда яткъанда, онынъ джаныны къуртармакъ керек олгъанда, санъа сини темизлемеге сыра тюшеми? Бар, шу синилернен омюрлик айырылма! - деп ачувлана сансарчыкъ. Шу арада синилер кадыннынъ огюне ве артына япышып къалалар. Уйкен къыз шашмалагъанындан ерге йыкъыла ве къаплыбакъагъа чевирилип къала. Сансарчыкъ гъарип къадыннынъ экинджи къызына бара. - Вай! - деп джеваплана о. - Мен шимди кетмеге азырым, лякин ишим пек чокъ, басма токъумакъ кереким. Токъусанъ токъуй бер, омюр бою току, ич бир вакъыт токътама, - дей кедерленип сансарчыкъ, ве оны бийге айландыра. Гъарип ананынъ кичкене къызы хамыр басып отургъанда, кимдир къапыны ача. Сансарчыкътан меселени анълагъанынен эллерини биле сюртмей, аман ельдай учып, анасынынъ янына келип ете. - Эр даим инсанларгъа къуванч кетир, меним зля козьлюм, - дей оньа сансарчыкъ. - Сени адамлар север, балаларынъны, торунларынъны, торунларынънынъ торунларыны севип-саяр, имае этерлер. Кендже къыз узун омюр яшай, балалы-чагъалы ола, торунларынынъ торунларыны коре. Бу дюньядан кетмек заманы кельгенде о балкъурткъа чевириле. Яз бою бал топлай, къышта исе джыллы сепетте яшай, ач олса, бал ве шекер ашай, ог аячыкълары исе эр даим бем-беяз, хамырлы эллерни анъдырып туралар. Автор видео и диктор: @haticeqirimli