Саха сирин өрүстэрэ быйыл орто болдьохтон түөрт сууккаҕа тиийэ эрдэлээн эстиэхтэрин сеп

Өлүөнэ өрүс алын тардыытыгар муус хамсааһынын Иркутскай уобалас Змеиново сэлиэнньэтин аннынан бэлиэтээтилэр. Ити Саха сирин быысаһар сириттэн 420 килэмиэтир тэйиччи. Оттон Өлүөнэ, Алдан өрүстэр салааларыгар уу таһыма сууккаҕа 10 сантиметрга диэри эбиллэр. Сабаҕалааһын быһыытынан, Өлүөнэ өрүс мууһа Ленскэй оройуонун уонна Өлүөхүмэ улууһун сиригэр-уотугар ыам ыйын төрдүһүттэн 13-с күнүгэр, Ханалас улууһун уонна Дьокуускай аннынан ыам ыйын 13-тэн 16-гар диэри, оттон Кэбээйи улууһун сиригэр-уотугар ыам ыйын 17-19 күннэригэр эстэрэ күүтүллэр.