Билсиҥ, саҥа аат: Илья Семенов - Ураанай уола

Биһиги Аммабытыгар Ураанай уола диэн псевдонимнаах, история чахчыларыгар олоҕуран олоҥхо остуоруйа, олоҥхо поэма, олоҥхо драма суруйар ураты дьоҕурдаах, Абаҕаттан төрүттээх Мээндиги нэһилиэгин баһылыга Илья Семенов хас эмит сыллаах ыанньыйбыт санааларын сурукка-бичиккэ тиһэн, уус-уран айымньы оҥорон, өрөөбүт уоһун өһүлэн, хоммут уоһун хоҥнорон литература эйгэтигэр дьоһуннаахтык киирдэ. Эдэр суруйааччы аҕыйах хонуктааҕыта “Харама Боотур уонна Амма куо“, “Легенды земли Мяндигинской“, “Амма быыһык кэмнэргэ“ уонна “Олоҕу олоҥхонон туойуохха“ диэн түөрт саҥа кинигэтин биир күҥҥэ сүрэхтиир дьоро күнэ киин бибилэтиэкэ сырдык саалатыгар истиҥ иэйиилээхтик, үрдүк таһымҥа ыытылынна. Төрөөбүт дойдута Абаҕа, үлэлиир, олорор сирэ Мээндиги нэһилиэктэрин тустарынан баай ис хоһоонноох быыстапка, “Кыһыл байыас“ гражданскай сэрии уонна “Сырдык аартык“ Аҕа дойду Улуу сэриитин кэмигэр үгүс оҕо сырдык тыынын салҕаабыт Абаҕа детдомун туһунан пьесалар афишалара, киэҥ экраҥҥа Илья Владимирович туһунан хаартыскалардаах презентация, “Харама Боотур уонна Амма Куо“ остуоруйатыгар Петр Романов иллюстрациялара дьоро күн буруйдааҕа дэгиттэр талааннаах суруйааччы, салайааччы буоларын көрдөрөллөр. Илья Владимировиһы бу долгутуулаах күнүнэн Амма улууһун баһылыгын бастакы солбуйааччы Василий Бураев, Амма нэһилиэгин баһылыга Михаил Артемьев, бииргэ төрөөбүт убайа, Абаҕа нэһилиэгин баһылыга Максим Семенов, кэргэнэ Алена Васильевналыын, кыраайы үөрэтээччи Михаил Алексеев, киин бибилэтиэкэ дириэктэрэ Прокопий Прокопьев, СӨ үтүөлээх учуутала Мария Ноговицына, улуустааҕы кииннэммит бухгалтерия салайааччыта Роман Алексеев, СӨ культуратын туйгуна, “Амма чэчирэ“ ансаамбыл уус-уран салайааччыта Анна Матвеева, Үстүүн Нохсоороп аатынан Абаҕатааҕы духуобунас киинин дириэктэрэ, СӨ культуратын үтүөлээх үлэһитэ Екатерина Яковлева, Абаҕатааҕы норуодунай тыйаатыр режиссера, СӨ культуратын туйгуна Евгения Попова, “Айар абылаҥ“ улуустааҕы литературнай түмсүү салайааччыта Наталия Рязанская, СӨ суруйааччыларын сойууһун чилиэнэ Дария Васильева - Амма Даайыс, Мээндигитээҕи “Алгыс“ сынньалаҥ киин дириэктэрэ Светлана Попова, Амма оройуонун Саха сиригэр гражданскай сэрии түмэлин дириэктэрэ Айантай Байдам, Мээндиги бибилэтиэкэтин кылаабынай бибилэтиэкэрэ Матрена Захарова эҕэрдэлээтилэр, үтүө мааны тылларын анаатылар, айар үлэтигэр ситиһиини баҕардылар. Биэриини бэлэмнээтэ Вера Иванова #писатель #писатели #якутия #саха #амга #сахасирэ #yakutia #презентация #книги #творчество #автор #олонхо #суруйааччы #глава #мяндиги