Mirfayaz Likməkani - Ğıbonə qujdi (ĞIBONƏ İDON MIBORƏK BIBU)

Çand milyon Hociyon vəyo bırındən Çiç kardən Məkkədə ğıbonə qujdi? Bunim harde zındən ə mısılmonon, Yəmən, Suriyədə ğıbonə qujdi? Qıləy ərəb bı ton bırındə dəvə, Qıləy ərəb bəton vəşiyə ləvə. Tınən bo ancero dastədə təvə Pul nıvıştə sədə ğıbonə qujdi. Bunim de Ğıboni kardən səvobi, Bəs boçi şedənin Ğıroni bobi? Koye? Buy ərbobi kəyku kəbobi, Kosib səydə kədə ğıbonə qujdi. Fik bıkaj, fik bıdaj bəvindej odəm, Heste yodoj beka əy çı qujdi təm. Bıbə puti baxşə, əy bıkə xurrəm, Bahan qədə-qədə ğıbonə qujdi. Im rujnə ruj İ’bey, bəy xanboz beye, Tikəy qujd ya co çi, çəy rımuz beye. Bə Xıdo i qəmən, Ğıbon - nez beye, Bəka ğəbul, dədə, ğıbonə qujdi! Ğıbon doy, ğıbon şey, bırye ğıboni, Bızın xəy hesteje konco, konco ni. Tolış mədə ğıbon ıştə zıvoni, Bənə ıştə vədə, ğıbonə qujdi. Mirfayaz Likməkani #mirfayazlikmekani #talysh #tolış #qurbanbayrami #ğıbonəid